Në kuadër të Sesionit të 81-të të Asamblesë së Përgjithshme të Kombeve të Bashkuara, ministri për Evropën dhe Punët e Jashtme, Ferit Hoxha, mori pjesë në diskutimin mbi forcimin e bashkëpunimit rajonal, të organizuar në kuadër të Kryesive të Rumanisë të Iniciativës së Evropës Qendrore (CEI) dhe Procesit të Bashkëpunimit të Evropës Juglindore (SEECP).

Gjatë fjalës së tij, Hoxha theksoi se në një botë të formësuar nga pasiguria në rritje, lufta, kërcënimet hibride, sulmet kibernetike dhe presionet ekonomike, përgjigjja jonë duhet të jetë e qartë: më shumë bashkëpunim, jo fragmentim; më shumë dialog, jo konfrontim; dhe më shumë veprime praktike.

Sipas Hoxhës, bashkëpunimi rajonal nuk është më vetëm një çështje marrëdhëniesh të fqinjësisë së mirë, por një domosdoshmëri strategjike.

“Për Shqipërinë, bashkëpunimi rajonal mbetet një gur themeli i politikës sonë të jashtme dhe një investim strategjik në paqen, sigurinë, qëndrueshmërinë dhe prosperitetin e Ballkanit Perëndimor dhe Evropës në tërësi”, tha Hoxha.

Për Ministrin e Jashtëm, bashkëpunimi rajonal dhe anëtarësimi në BE ndërlidhen reciprokisht.

“Lidhjet më të forta rajonale ndihmojnë në avancimin e perspektivës evropiane, ndërsa perspektiva e anëtarësimit në BE ofron një shtysë të fuqishme për bashkëpunim, reformë dhe lidhshmëri. Besimi mundëson bashkëpunimin, bashkëpunimi forcon qëndrueshmërinë dhe qëndrueshmëria krijon mundësi për qytetarët tanë”, përfundoi ministri Hoxha.

Marrë nga ATSH