Crowdfunding po shndërrohet gjithnjë e më shumë në një alternativë reale ndaj formave tradicionale të financimit, duke ndihmuar startup-et dhe ndërmarrjet mikro, të vogla dhe të mesme (NMVM) të sigurojnë kapital për zhvillim, inovacion dhe krijim të vendeve të reja të punës.

Ekspertë të Bankës Botërore, së bashku me përfaqësues nga Ministria e Ekonomisë dhe Inovacionit, Ministria e Financave, Autoriteti i Mbikëqyrjes Financiare, Banka e Shqipërisë, Agjencia Startup Albania dhe aktorë të tjerë të sektorit privat, zhvilluan një takim teknik për rolin e crowdfunding-ut në mbështetjen e ekosistemit të inovacionit dhe sipërmarrjes në vend.

BB bën të ditur se, gjatë takimit ekspertët theksuan se, për krijimin e një tregu funksional dhe të sigurt për crowdfunding, është e nevojshme ngritja e një baze ligjore dhe rregullatore të posaçme, që do të përcaktojë rolet e platformave, mënyrën e licencimit dhe mbrojtjen e investitorëve dhe sipërmarrësve.

“Crowdfunding shihet si një mundësi reale për të lehtësuar aksesin në financim për startup-et, bizneset e vogla dhe të mesme, si dhe për të angazhuar diasporën shqiptare në mbështetjen e projekteve zhvillimore në vend”, nënvizon BB.

Ky proces, që po zhvillohet në bashkëpunim me partnerët ndërkombëtarë, pritet të hapë rrugën për një treg financiar më gjithëpërfshirës dhe inovativ, në përputhje me standardet e Bashkimit Europian.

Crowdfunding është praktika e financimit të një projekti ose sipërmarrjeje të re, duke mobilizuar grupe investitorësh të vegjël, apo donatorësh nëpërmjet platformave online.

Burimi ATSH