Ambasadori i Shqipërisë në Shtetet e Bashkuara të Amerikës, Ervin Bushati, ka marrë çmimin “Diplomatic Award” gjatë një aktiviteti të organizuar në Filadelfia, kushtuar historisë së shpëtimit të hebrenjve në Shqipëri gjatë Luftës së Dytë Botërore.

Sipas një postimi të publikuar në rrjetet sociale, aktiviteti me temë “Nderimi i një Heroi Shqiptar dhe Miqësisë Shqiptaro-Izraelite” mblodhi pjesëmarrës për të përkujtuar kontributin e shqiptarëve në mbrojtjen e hebrenjve gjatë luftës.

Gjatë ceremonisë, ambasadori Bushati pranoi çmimin “Diplomatic Award” në emër të Qeverisë së Republikës së Shqipërisë.

Vlerësimi iu kushtua Shqipërisë dhe trashëgimisë së saj të humanizmit dhe solidaritetit, duke vënë në pah historinë e strehimit dhe shpëtimit të hebrenjve nga familjet shqiptare.

Aktiviteti synoi gjithashtu të promovojë lidhjet historike dhe miqësinë shqiptaro-izraelite, përmes kujtesës së një prej kapitujve të rëndësishëm të historisë së Luftës së Dytë Botërore.

/EUnews.al