Në kuadër të dixhitalizimit të shërbimeve publike dhe lehtësimit të procedurave për qytetarët dhe bizneset, të gjitha aplikimet për leje ndërtimi në Shqipëri kryhen tashmë online, përmes platformës zyrtare e-Albania.

Ky proces modern dhe i standardizuar garanton një aplikim më transparent, të shpejtë dhe të sigurt, duke shmangur burokracitë dhe kontaktet fizike me sportelet.

Dokumentet zyrtare që gjenerohen në përfundim të aplikimit janë të pajisura me vulë elektronike, çka i bën ato të vlefshme dhe të verifikueshme nga çdo institucion publik apo privat.

Statistikat tregojnë rritje të qëndrueshme të aplikimeve për leje ndërtimi.

Që prej vendosjes së aplikimit online për leje ndërtimi në vitin 2016, janë regjistruar mbi 145,000 aplikime në sistemin elektronik, duke reflektuar besimin në rritje të qytetarëve dhe aktorëve të tregut ndërtimor ndaj platformës digjitale.

Mesatarja vjetore e aplikimeve në tre vitet e fundit ka qenë rreth 20,000 aplikime në vit, një tregues i përdorimit të qëndrueshëm dhe të lartë të këtij shërbimi.

Në periudhën janar-gusht 2024, u regjistruan 11,348 aplikime, ndërsa për të njëjtën periudhë të vitit janar- gusht 2025, janë regjistruar 12,314 aplikime, duke shënuar një rritje të ndjeshme dhe një vazhdimësi të trendit pozitiv.

Ky progres është rezultat i angazhimit të institucioneve për të ofruar shërbime më efikase dhe në përputhje me standardet europiane të administratës publike.

Burimi ATSH