Ministrja e Turizmit dhe Mjedisit, Mirela Kumbaro dhe kryetari i bashkisë së Gjirokastrës, Flamur Golemi u takuan me forcat zjarrfikëse të kësaj bashkie për mbarëvajtjen e operacioneve kundër zjarreve në qark.

Gjatë takimit, Kumbaro i shprehu mirënjohjen forcave zjarrfikëse të bashkisë Gjirokastër, pas takimit të zhvilluar me ata në Memaliaj e Tepelenë.

“Forcat zjarrfikëse me shumë profesionalizëm dhe guxim kanë qenë gjatë gjithë kësaj jave në terren nga të 7 bashkitë e qarkut Gjirokastër, kudo ku ka pasur nevojë, por edhe duke ndihmuar bashkitë fqinje në Finiq e Delvinë”, theksoi Kumbaro.

Kumbaro u shpreh se “jemi në gatishmëri për çdo vatër zjarri, teksa bashkëpunimi me Policinë e Shtetit do të jetë i vazhdueshëm për të ndëshkuar çdo të paudhë që luan me flakët duke rrezikuar pasuritë natyrore dhe fshatrat”.

Temperaturat e larta të ditëve të fundit dhe era favorizuan përhapjen e zjarreve në disa zona duke krijuar situatë kritike që kërkoi angazhimin emergjent të trupave të Mbrojtjes Civile. Sot, situata e zjarreve duket më e stabilizuar.

Në qarkun Gjirokastër, vijon puna për shuarjen e zjarrit të ardhur nga bashkia Finiq në territorin e bashkisë Dropull, në drejtim të fshatit Dhuvjan dhe fshatrat Lugar e Frashtan, vatër e cila u përhap në dy fronte në majën e Leftokaresë dhe më pas u vu nën kontroll. Vijon puna për shuarjen e zjarrit në Hormovë, njësia administrative Qendër Tepelenë, bashkia Tepelenë.

Sot nuk ka vatra aktive në fshatra, por vetëm në lartësi të Majës së Golikut. Në malin e Sopotit ka rënë zjarr në afërsi të antenave të RTSH. Sipërfaqja e djegur po mbahet nën monitorim.

Burimi ATSH