Zonat e mbrojtura në Shqipëri janë vizituar nga 1.28 milionë persona në periudhën nga nisja e vitit deri në maj.

Shifra u bë publike nga ministrja e Turizmit dhe Mjedisit Mirela Kumbaro në një postim në rrjetet sociale.

“1.28 milionë vizitorë gjatë periudhës janar-maj 2025 janë shënuar në zonat tona të mbrojtura, parqe kombëtare e natyrore, laguna dhe alpe, oaze të biodiversitetit, peizazhe mbresëlënëse të natyrës, destinacione ekoturizmi dhe hapësira të edukimit të gjelbër për fëmijët e Shqipërisë”, theksoi Kumbaro.

Zonat e Mbrojtura në Shqipëri vlerësohen si një mundësi efektive për zhvillimin e turizmit të qëndrueshëm. Pavarësisht se është një vend relativisht i vogël, Shqipëria është jashtëzakonisht e pasur me biodiversitet. Shumica e tyre është e përcaktuar në kategorinë “Monument natyre”.

Qeveria dhe MTM po punojnë që këto zona të mbrojtura të promovohen për vlerat e jashtëzakonshme të biodiversitetit që ato mbartin, por edhe si destinacione të rëndësishme turistike në nivel kombëtar dhe më gjerë.