Kryeministri, njëherësh kryetari i Partisë Socialiste, Edi Rama gjatë një bashkëbisedimi me biznesin në Elbasan foli edhe për projektet infrastrukturore në këtë qytet.

“Bajpasin e Elbasanit e kemi në planin buxhetor, është përfshirë në projektet e rëndësishme infrastrukturore që do të financohen. Nga pikëpamja jonë e buxhetit kemi përcaktuar fondet, presim të përfundojmë një marrëveshje me Fondin e Arabisë Saudite me të cilët kemi marrëdhënie shumë të mirë për të plotësuar shumën. Procesi do të fillojë sepse një pjesë aq sa duhet të buxhetit për të filluar procesin e kemi”, tha Rama.

Kryeministri Rama e vuri theksin edhe tek ndërtimi i parkimit në këtë qytet.

“Ne e dimë që bashkitë kanë vështirësitë e tyre dhe kemi bërë një program kombëtar për të mbështetur bashkitë me FSHZH për të ndërtuar parkime, qoftë nën dhe mbi tokësore dhe madje do angazhojmë edhe arkitektë të huaj për të krijuar edhe objekte që mund të jenë të bukura, që të mos jenë nga ato si depo makinash. Kjo ka ardhur si rezultat i nevojës për të ndihmuar industrinë e turizmit në vijën bregdetare ku ka intensitet shumë të madh makinash”, tha Rama.

Burimi ATSH