Me rastin e Muajit të Shenjtë të Ramazanit, u shtrua mbrëmjen e sotme në Elbasan një iftar nga Myftinia e Elbasanit dhe deputeti Florenc Spaho.

Të pranishëm në këtë iftar ishin gjithashtu edhe ministri i Pushtetit Lokal, Arbian Mazniku, kryetari i Bashkisë së Elbasanit, Gledjan Llatja, deputetja e Kuvendit, Evis Kushi, Shkëlqim Hajdari, përfaqësues të komuniteteve fetare të qytetit, përfaqësues të shoqërisë civile si dhe besimtarë të shumtë e agjërues të përkushtuar.

“Ky muaj i bekuar na fton të jemi më të afërt me njëri-tjetrin, të ndajmë mirësinë, dashurinë dhe bujarinë, siç na mëson feja dhe tradita jonë e pasur”, shkruan Myftinia Elbasan në një postim në rrjetet sociale.

“Sofra e Ramazanit nuk është vetëm ushqim për trupin, por mbi të gjitha një ushqim për shpirtin, një moment reflektimi, falënderimi dhe afrimi me Zotin dhe me njerëzit rreth nesh”, thuhet në postim.

“Zoti i pranoftë agjërimet dhe lutjet e të gjithë atyre që në këtë muaj shtrijnë dorën e mirëkuptimit dhe dashurisë!”, e përmbyll reagimin Myftinia Elbasan.

Nga 1 marsi besimtarët myslimanë kanë nisur Muajin e Shenjtë të Ramazanit me agjërimin, një nga shtyllat dhe detyrat madhore të besimit islam.