Parku Kombëtar “Mali i Tomorit” mbetet një nga destinacionet e preferuara turistike nga turistë vendas dhe të huaj në çdo stinë të vitit.

Kryeministri Edi Rama, ndau në rrjete sociale pamje nga ky park me dëborë.

“Parku Kombëtar “Mali i Tomorit” që çdo ditë pret grupe vizitorësh që ngjiten në lartësinë 2397m për përvoja të jashtëzakonshme dhe për të vizituar atraksionet natyrore e objektet e kultit”, shkroi Rama.

Mali i Tomorit shtrihet në lindje të qytetit të Beratit dhe verilindje të qytetit të Çorovodës dhe gëzon statusin e Parkut Kombëtar. Aty nuk mungojnë ngjitjet sportive në shpatet me borë apo aventurierë të raftingut në kanionet e Osumit.

Nën këmbët e Tomorit, rrjedh lumi Osum që duke zbritur nga terrene tepër malore ka krijuar kanionet e famshme të tij tepër të vizituara, sidomos gjatë stinës së verës.

Por, jo vetëm kanionet, në këtë itinerar gjenden dhe disa objekte kulti të feve kristiane e bektashiane dhe monumente të natyrës dhe të kulturës që ngjallin interes të vazhdueshëm nga vizitorë dhe turistë të huaj për t’u eksploruar, krahas ushtrimit të sporteve të aventurës.

Burimi ATSH