Zv.ministri i Mbrojtjes, Enkelejd Joti, ishte sot i pranishëm në Komisionin për Ekonominë, Punësimin dhe Financat, ku u shqyrtua, në cilësinë e komisionit për dhënie mendimi, projektligji “Për pjesëmarrjen e Forcave të Armatosura të Republikës së Shqipërisë në operacionin ushtarak të Forcës Ndërkombëtare të Stabilitetit, në Gaza”.

Joti tha se qëllimi i projektligjit është të mundësojë kontributin e Shqipërisë në një mision ndërkombëtar për sigurinë dhe stabilitetin, të ngritur në përgjigje të situatës në Rripin e Gazës.

Sipas tij, angazhimi mbështetet në autorizimin e dhënë nga Këshilli i Sigurimit të OKB-së në nëntor 2025 për krijimin e Forcës Ndërkombëtare të Stabilitetit dhe është në përputhje me angazhimet e Republikës së Shqipërisë në kuadër të Bordit të Paqes.

Misioni synon të kontribuojë në ruajtjen e sigurisë dhe stabilitetit, si dhe në mbështetjen e përpjekjeve humanitare në zonën e operacionit.

“Pjesëmarrja e Shqipërisë në këtë mision përfaqëson një vazhdimësi të politikës sonë të jashtme dhe të sigurisë, e cila mbështetet në kontributin aktiv për paqe dhe siguri, si dhe në respektimin e detyrimeve dhe përgjegjësive që burojnë nga partneritetet dhe angazhimet ndërkombëtare të vendit”, tha Joti.

Projektligji parashikon që në operacion të marrin pjesë deri në 40 efektivë të Forcave të Armatosura të Republikës së Shqipërisë. Detyrat e tyre do të përfshijnë mbështetjen e operacionit të sigurisë dhe stabilitetit, mbrojtjen e personelit dhe infrastrukturës së misionit, mbështetjen e operacioneve humanitare, si dhe monitorimin dhe raportimin e situatës së sigurisë, në përputhje me mandatin e misionit.

Joti theksoi se projektligji shoqërohet me efekte financiare, të cilat do të përcaktohen rast pas rasti me vendim të Këshillit të Ministrave dhe do të përballohen nga fondet e parashikuara në buxhetin e Ministrisë së Mbrojtjes.

Shpenzimet për personelin pjesëmarrës në operacion do të përfshijnë trajtimin me dietë për çdo ditë qëndrimi, përveç pagës mujore, sigurimin e jetës, shpenzimet për ushqim, sigurimin shëndetësor për ditët e udhëtimit dhe për periudhën jashtë zonës së operacionit, mbështetjen shëndetësore, shpenzimet për telefoninë, internetin dhe shërbimet postare, si dhe çdo shpenzim tjetër të nevojshëm për mbarëvajtjen dhe kryerjen e operacionit.

Sipas zv.ministrit të Mbrojtjes, projektligji është në përputhje me Kushtetutën dhe respekton kuadrin ndërkombëtar, përfshirë deklaratën e Bordit të Paqes. Projektligji propozohet të shqyrtohet me procedurë të përshpejtuar.

Joti tha se, nisma synon t’i japë Shqipërisë bazën e nevojshme ligjore për të kontribuar në një operacion ndërkombëtar të sigurisë, në përputhje me interesat strategjike të vendit dhe angazhimin e tij si partnere në ruajtjen e paqes dhe stabilitetit ndërkombëtar.

Burimi ATSH