Ministri i Financave, Petrit Malaj, deklaroi se rritja ekonomike po shoqërohet me rritje të mbështetjes financiare për qytetarët, duke iu referuar shifrave të buxhetit të shtetit për 7-mujorin e parë të vitit.

“Kam lexuar shumë komente nga qytetarët të cilët pyesin: një rritje ekonomike, a përkthehet kjo në më shumë mbështetje për qytetarët?”, tha Malaj, duke theksuar se përgjigjja gjendet te të dhënat e buxhetit.

Sipas ministrit, gjatë shtatë muajve të parë të vitit janë shpenzuar 841 milionë lekë më shumë krahasuar me të njëjtën periudhë të një viti më parë për ndihmën ekonomike, personat me aftësi të kufizuara dhe kujdestarët e tyre.

Malaj bëri të ditur gjithashtu se janë dhënë 576 milionë lekë më shumë për ish-të përndjekurit politikë dhe 300 milionë lekë më shumë për bonusin e lindjeve.

“Pra, në çdo drejtim, më shumë mbështetje. Pas çdo shifre ka njerëz, ka familje, ka fëmijë dhe ky është qëllimi ynë: të mbledhim më shumë të ardhura”, deklaroi Malaj.

Ai theksoi se rritja ekonomike duhet të ndihet edhe në jetën e përditshme të qytetarëve, përmes më shumë mbështetjes për familjet në vështirësi, personat me aftësi të kufizuara dhe kategoritë që kanë më shumë nevojë.

Burimi ATSH