Në Shtëpinë e Evropës u prezantua sot programi i Bashkimit Evropian, SOCIEUX+, i cili shënon një tjetër hap për të ndihmuar Shqipërinë të përmbushë standardet e BE-së.

SOCIEUX+ sjell një ekspertizë evropiane për përmirësimin e sistemeve të mbrojtjes sociale, punës dhe punësimit, nëpërmjet shkëmbimit të njohurive, të përshtatura për të përmbushur nevojat e Shqipërisë.

Kjo tregon përkushtimin e BE-së për të mbështetur Shqipërinë në rrugën e saj drejt një shoqërie më të fort dhe gjithëpërfshirëse.

Hubert Perr, shef i Bashkëpunimit në delegacionin e BE-së në Shqipëri shprehu kënaqësinë për fillimin e SOCIEUX+, program që sipas tij, ofron mbështetje afatshkurtër në fushën e mbrojtjes sociale, punës dhe punësimit, bazuar në modelin e shkëmbimit.

“Mbështetja e ofruar nga SOCIEUX+ mund të ndihmojë Shqipërinë të përfitojë nga përvoja dhe praktikat më të mira nga vendet anëtare të BE-së duke përafruar legjislacionin dhe standardet e saj në procesin e anëtarësimit në BE. Por kjo nuk ka të bëjë vetëm me ndryshimin e ligjeve; ka të bëjë me transformimin e shoqërisë për të mirën e të gjithë shqiptarëve”, tha Perr.

Burimi ATSH