Numri i kërkesave të shtetasve shqiptarë që jetojnë jashtë vendit për t’u regjistruar në platformën Platformën Elektronike të Regjistrimit (PER) e ka kaluar shifrën 40 mijë.

Kryekomisioneri Shtetëror i Zgjedhjeve, Ilirjan Celibashi, tha se numri më i madh i refuzimeve është nga Italia dhe shkak se lidhet me gabimin që bën shumica dërrmuese e votuesve kur ngarkojnë dokumentin e adresës.

“Shumica kanë ngarkuar dokumentin e identitetit të lëshuar nga shteti italian, por nga ana e gabuar nga faqja që nuk përmban adresën. Duhet të ngarkojnë në PER faqen e dokumentit të lëshuar që përmban adresën”, tha Celibashi.

“Kemi bërë një shembull në lidhje me atë se si dhe në çfarë mënyrë. Nuk është kjo faqja që duhet të ngarkohet por faqja tjetër që përmban adresën. Janë mbi 90 % të shkaqeve të refuzimit për këtë arsye”, shtoi Celibashi.

Celibashi tha se gabimi që bëjnë shumica e aplikantëve lidhet me mënyrën sesi dhe çfarë dokumenti provues të ngarkojnë në sistem në PER.

“Gjatë ngarkimit të dokumentit provues të adresës është e rëndësishme që të përmbajë adresën që kanë deklaruar në PER, adresa të jetë e njëjtë me adresën që kanë deklaruar dhe ky dokument të përmbajë të dhëna që lidhen me identitetin e zgjedhësit”, tha Celibashi.