“Një qytet për të gjithë”, libri i ish-kryebashkiakut të Bogotës, Enrique Penalosa, i përkthyer së fundmi në shqip, u prezantua dje në një aktivitet të organizuar nga shtëpia botuese “Dudaj”.

Në prezantimin e librit ishte i pranishëm ish-kryebashkiaku i Bogotës, Enrique Penalosa si dhe kryebashkiaku i Tiranës, Erion Veliaj.

“Penalosa është një frymëzues për kryebashkiakët kudo në botë, se si edhe problemet më të vështira për një qytet, ai i bën të zgjidhshme, duke sjellë shembullin personal”, tha Veliaj.

Veliaj u ndal te projekti i bashkisë së Tiranës, në bashkëpunim me GIZ-in gjerman, për një sistem të ri të transportit urban në qytet.

Veliaj tha se “ky është një projekt që është zbatuar fillimisht në Bogota nga ekipi i Penalosa-s”.

Kryebashkiaku Veliaj u shpreh se skuadra e tij do të angazhohet për të ndihmuar ekipin e bashkisë së Tiranës në këtë projekt.

“TransMilenio [sistemi i transportit në Bogota] ishte një mënyrë shumë kreative për qytetet që nuk e përballojnë dot koston e një metroje. Ne kemi marrë grantin më të madh dhe kredinë më të madhe mes KfW dhe BE për të prodhuar versionin tonë të TransMilenio-s. Duke qenë se nuk jemi ende në kushtet financiare që të përballojmë një metro, – të cilën do ta përballojmë kur të jemi në BE dhe të kemi akses në financa më të mëdha, – na duhet një zgjidhje e ndërmjetme. Frymëzimi se si TransMilenio sot është kopjuar ose përshtatur nga 300 qytete, besoj se është një lajm i mirë për vendimmarrjen që kemi marrë, por edhe për faktin se një pjesë e ekipit të Penalosa-s do të na ndihmojnë në këtë drejtim në në Tiranë”, tha Veliaj.

Në fjalën e tij, Penalosa theksoi se libri “Një qytet për të gjithë” flet për mënyrën se si mund t’i bëjmë qytetet më të mira, që do të jenë aty për qindra apo mijëra vitet e ardhshme.

“Ky libër flet se si mund t’i bëjmë qytetet më mirë. Unë jap shumë shembuj nga përvoja ime, por sot do të theksoj çfarë mendoj dhe dëshiroj që të jetë thelbi i librit, që është çështja e barazisë. Asgjë nuk është më e rëndësishme. Qytetet që po ndërtojmë do të jenë aty për qindra dhe mijëra vjet. Kur ne ndërtojmë një qytet, jemi duke përcaktuar edhe stilin tonë të jetesës”, tha ai.

Penalosa ndodhet në Tiranë për prezantimin e librit të tij të përkthyer në gjuhën shqipe, “Një qytet për të gjithë”, në të cilin ai propozon se një qytet i drejtë dhe i barabartë ndërton integrimin social dhe legjitimitetin.

Gjatë pritjes në bashkinë e Tiranës, ai u nderua me Çelësin e Qytetit nga kryebashkiaku Erion Veliaj i cili theksoi se “Penalosa ka frymëzuar shumë kryetarë bashkish në botë për të transformuar qytetet në hapësira më të jetueshme për qytetarët”.

(ATSH)