Nga Marash Mirashi

LOTËT E KUQ TË TRËNDAFILIT

Kur nëna
e la për herë të fundit oborrin
ndieva përmalljen e hardhive,
pashë lotët e kuq të trëndafilit
në verandë,
e im atë që besonte
se jeta e tij kish qenë
një shije e thellë parfumi
të kuqrremtë
si perëndim.
Ndieva meshën e trëndafilave
dhe një puhizë ere
që u mësonte dallëndysheve
Ave Marinë.
Pashë për të fundit herë
fytyrën e bukur të nënës
me petale
si zemra të vogla
tek dilnin nga fryma e tim eti
si e vetmja mënyrë
që ai kish zgjedhur
për t’u ndarë
me dashurinë.