E përditshmja spanjolle “Que’! Madrid” në një artikull të botuar e ka cilësuar Shqipërinë një perlë të vërtetë për t’u zbuluar në Ballkan.

Ministrja e Turizmit dhe Mjedisit, Mirela Kumbaro ndau në rrjetet sociale artikullin e botuar nga “Que’! Madrid”, ndërsa theksoi se “që pas panairit të turizmit “FITUR Madrid” Shqipëria ka qenë në qendër të vëmendjes së medieve spanjolle, ndër to edhe revista “Que Madrid” që sugjeron vendin tonë për peizazhet e pacënuara, natyrën e egër dhe trashëgiminë kulturore mbresëlënëse”.

Kumbaro u shpreh se “prurjet turistike nga Spanja vazhdojnë të jenë “on top”, ku gjatë janarit mirëpritëm dy herë më shumë vizitorë spanjollë krahasuar me vitin e shkuar”.

“Natyra dhe peizazhet e Shqipërisë janë mjaft tërheqëse, ku mund të zbuloni sisteme malore dhe liqene spektakolare. Udhëtarët do të kenë mundësinë të vizitojnë qytetet historike si Butrintin, Beratin dhe Gjirokastrën, të shpallura si vende të trashëgimisë botërore nga UNESCO për veçantinë e tyre arkitekturore, artistike dhe kulturore. Gjithashtu, mund të vizitoni liqenin e Ohrit, një nga më të vjetrit në planet, si dhe kishën e Shën Sofisë që daton në shekullit XI. Duke vazhduar turin në Ballkan, do të keni mundësinë të vizitoni edhe Manastirin e Shën Naumit, i njohur për arkitekturën e stilit bizantin; qytetin e Korçes, me pazarin e saj osman dhe katedralen e saj ortodokse, dhe Kalanë e Lëkurësit, nga e cila mund të shijoni pamjet më të bukura të gjirit të Sarandës”, shkruhet ndër të tjera në artikullin e Veronica Santana për të përditshmen spanjolle “Que’! Madrid”.