
Rama: Ulja e TVSH-së për 54 produkte ushqimore të reflektohet te qytetarët
Kryeministri Edi Rama në episodin e gjashtë, të sezonit të shtatë, të podkastit “Flasim” u fokusua tek Paketa e re Fiskale, e cila parashikon nga 1 janari 2027 uljen e TVSH-së nga 20%, në 6% për 54 produkte ushqimore bazë dhe garantimi i reflektimit të kësaj mase në çmimet për konsumatorët.

Kryeministri Edi Rama në episodin e gjashtë, të sezonit të shtatë, të podkastit “Flasim” u fokusua tek Paketa e re Fiskale, e cila parashikon nga 1 janari 2027 uljen e TVSH-së nga 20%, në 6% për 54 produkte ushqimore bazë dhe garantimi i reflektimit të kësaj mase në çmimet për konsumatorët.
Rama tha se “për këtë episod kemi zgjedhur një temë, e cila lidhet me aktualitetin dhe këtu kam parasysh miratimin nga Parlamenti të Paketës re Fiskale ku një pikë shumë e rëndësishme ishte një pikë që adreson një problematikë të mirënjohur nga të gjithë, problematikën e çmimeve të ushqimeve bazë për të cilat 54 produkte, parlamenti, me propozim të qeverisë, vendosi që të ulë tatimin mbi vlerën e shtuar nga 20 në vetëm 6%”.
“Por që kjo ulje të mos jetë një ulje që të mbetet relative, sepse gjithsesi një ulje do reflektohet, por që të mbetet në shifrat e ligjit, duhet që edhe zbatimi në praktikë të shoqërohet me njëra anë vetëdije dhe përgjegjshmëri prej tregtarëve, por nga ana tjetër me monitorim dhe sa më shumë transparencë nga ana e qeverisë”, theksoi Rama.
Për të garantuar që ulja e taksës të pasqyrohet realisht në treg, kreu i qeverisë vuri në dukje rëndësinë e platformës së re “Pasqyra digjitale e çmimeve”, e cila sipas tij po jep rezultate inkurajuese.
Kreu i qeverisë u shpreh se “ne sot nuk hyjmë në një terren të panjohur, sepse në ndërkohë kemi një instrument shumë të ri që është aktiv, me rezultate inkurajuese, që është “Pasqyra digjitale e çmimeve”, e cila gjendet e reflektuar edhe në të gjitha ato pika shitje që e kanë përqafuar këtë iniciativë”.
Rama sqaroi se përmes kësaj platforme raportohen në kohë reale çmimet e qindra produkteve.
“Këto pika shitjeje raportojnë faktikisht çmimet e 224 produkteve dhe qytetarët kanë mundësi të bëjnë krahasime dhe të zgjedhim, por ndërkohë dhe për vetë rrjetet e supermarketeve, që janë edhe partnerët tanë në këtë në këtë proces është e rëndësishme që të shohin në kohë reale njëri-tjetrin”, nënvizoi Rama.
Në podkast, krahas përfaqësuesve të tre prej rrjeteve të supermarketeve që operojnë në vend “Conad”, “Interbrand” dhe “Xhangolli”, ishte e pranishme edhe zhvilluesja e platformës, inxhinierja e softuereve Enkelana Laçi, e cila drejton skuadrën e zhvilluesve në Agjencinë e Inovacionit dhe Ekselencës.
Gjatë bashkëbisedimit, Kryeministri kërkoi edhe përshtypjet e para nga përfaqësuesit e rrjeteve tregtare mbi funksionimin e platformës dhe rezultatet e saj, pas periudhës së parë të zbatimit.
Pronari i rrjetit të marketeve “Xhangolli”, Hysen Xhangolli, vlerësoi krijimin e kësaj platforme, duke theksuar se konsumatorët kanë nevojë për transparencë dhe mundësi krahasimi, në mënyrë që të orientohen drejt ofertave dhe çmimeve më të favorshme.
“Një nga aspektet që kërkon përmirësim është zgjerimi i produkteve të përfshira në platformë, në mënyrë që qytetarët të kenë më shumë alternativa për të bërë zgjedhjen e tyre. Ka nevojë për përmirësim, të shtohen produkte të tjera në vazhdim, që njerëzit të shikojnë dhe të bëjnë zgjedhjen. Por është gjë pozitive”, u shpreh pronari i “Xhangollit”.
Ndërsa Evisa, përfaqësuese e kompanisë “Interbrand”, e cilësoi nismën për uljen e çmimeve si një mision që ka në qendër konsumatorin, i cili është i ndjeshëm ndaj çmimeve dhe kërkon produkte cilësore me kosto më ekonomike.
Ajo theksoi se “Interbrand” ka qenë ndër kompanitë e para që ka kontribuar në këtë nismë, që në momentin e prezantimit të saj.
“Kompania vendosi që ulja e çmimeve të aplikohet në të gjithë tregun, në mënyrë që përfitimi të mos kufizohet vetëm te konsumatorët që blejnë në supermarketet pjesëmarrëse në platformë, por të shtrihet edhe në dyqanet e lagjeve”, tha ajo.
Përfaqësuesja e “Conad”, Aurora, u shpreh se rrjeti njihet si supermarket premium, për shkak të nivelit dhe kategorisë së produkteve që ofron, por ky perceptim nuk pasqyron gjithmonë realitetin e çmimeve.
Ajo theksoi se krahasimi i produkteve identike në platformë tregon se “Conad” nuk është gjithmonë më i shtrenjtë se rrjetet e tjera.
“Neve na ka ndihmuar pikërisht për të vërtetuar këtë gjë, që ne nuk jemi më të shtrenjtët. Për sa u përket produkteve bazë që i gjen në të gjithë tregun, pa përmendur markat, ne jemi pak a shumë me çmimet e tregut dhe për këtë gjë pasqyra na ndihmon shumë”, u shpreh përfaqësuesja e “Conad”.
Enkelana Laçi, inxhinere softueresh dhe drejtuese e skuadrës së zhvilluesve të platformës së Pasqyrës së Çmimeve në Agjencinë e Inovacionit dhe Ekselencës, bëri të ditur se të dhënat tregojnë interes të lartë të qytetarëve për këtë instrument digjital.
“Platforma ka regjistruar mbi 10 mijë vizitorë unikë dhe më shumë se 63 mijë hapje të faqes, ndërsa përdoruesit shfletojnë mesatarisht rreth pesë faqe gjatë vizitës”, theksoi Laçi.
Ajo u ndal edhe te ndikimi i platformës në lëvizjen e çmimeve në treg, duke bërë të ditur se gjatë pesë javëve të para është konstatuar ulje çmimesh për 34% të produkteve të monitoruara.
Laçi theksoi se transparenca e të dhënave ka nxitur konkurrencën mes tregtarëve, të cilët kanë reaguar duke rishikuar çmimet dhe duke rritur numrin e artikujve që ofrojnë me çmime më të ulëta.
“Është vënë re konkurrenca, ka lëvizur tregu dhe kjo ndodh kur ka transparencë të të dhënave”, u shpreh Laçi.
Burimi ATSH


















