Ministri për Evropën dhe Punët e Jashtme, Igli Hasani, në një reagim në rrjetet sociale sjell në vëmendje përgatitjet për Ditën e Arbëreshëve dhe Samitin e tretë të Diasporës, që do të mbahen në Tiranë në datat 22-23 nëntor.

Ministri Hasani në ftesën e tij për pjesëmarrje në këto dy evenimente të rëndësishme ka sjellë dhe zërin e kryetarit të bashkisë së “Piana degli Albanesi”, komuna arbëreshe në Itali, Rosario Petta.

“Rosario Petta është aktivist dhe koordinator i dalluar, me një kontribut të vyer në ruajtjen e gjuhës dhe traditave arbëreshe sidomos në marrëdhënie me vendin e origjinës”, u shpreh Hasani ndërsa publikoi videomesazhin e kryebashkiakut italian.

“Dita e arbëreshëve dhe Samiti i tretë i Diasporës janë ditë shumë të rëndësishme për të gjithë arbëreshët dhe për të gjithë shqiptarët, një iniciativë kulturore për t’u lidhur më shumë të gjithë ne, me Shqipërinë”, është mesazhi i kryebashkiakut Petta.