Ministrja për Europën dhe Punët e Jashtme, Olta Xhaçka priti sot në takim lamtumire ambasadoren amerikane, Yuri Kim në vizitën e saj të fundit si ambasadore e Shteteve të Bashkuara të Amerikës në Shqipëri.

“Është e trishtueshme të shohësh një mike të mirë të largohet. Kemi punuar shumë së bashku për avancimin e marrëdhënieve midis dy vendeve tona dhe i jemi mirënjohës Yurit që me zemër ka punuar për interesin më të mirë të Shqipërisë”, u shpreh Xhaçka në rrjetet sociale.

“I urova gjithë të mirat në misionin e saj të ri e të rëndësishëm. E sigurtë që rrugët tona do të kryqëzohen sërish në të ardhmen”, shtoi ministrja.

Ambasadorja Yuri Kim përfundon mandatin e saj në vendin tonë, ndërsa pritet ambasadori i ri amerikan David Kostelançik, diplomat me karrierë të gjatë në DASH.