Nga ILIR ÇUMANI

Kanë kaluar plot 20 vjet, që kur personalisht e ideova, nxita përmes procedurave ligjore dhe jetësova 20 Majin si një ditë SIMBOL, si ditë kujtese dhe sensibilizimi për të gjithë shoqërinë dhe institucionet për një vëmendje të shtuar dhe kujdes të vazhdueshëm ndaj shtresës më të dobët dhe më të pambrojtur të shoqërisë; fëmijëve pa familje dhe pa kujdes prindëror. Një vëmendje dhe kujdes i madh që nuk duhet të jetë vetëm në 20 Maj, por në çdo ditë të vitit.

Mirëpo, shpesh dhe me keqardhje kam dëgjuar dhe kam konstatuar në mënyrë të vazhdueshme se, shumë media, institucione shtetërore, OJF, individë të ndryshëm, madje edhe deputetë, (ligjvënës), me dhe pa asnjë lidhje me kauzën e jetimëve, përmes kakofonive krijojnë zhurmë mediatike me moskuptime dhe keqkuptime kur artikulojnë në gojën e tyre duke e konsideruar dhe duke e paraqitur 20 Majin si “Ditë (Ndër)Kombëtare e Jetimëve” dhe si një “Ditë Feste….!”

Kjo është e papranueshme, njëkohësisht edhe fyese, jo vetëm për ideatorët që e celebruan dhe e jetësuan këtë Ditë Kujtese dhe Reflektimi.

Në radhë të parë, është fyese edhe për Target Grupin së cilës i është dedikuar kjo DITË SIMBOL, që tregon qartazi mungesën e seriozitetit me të cilën duhet parë këndvështrimi i kësaj date simbolike, që na kujton të gjithëve se sa borxh të madh i kanë institucionet dhe mbarë shoqëria të gjithë shtresës së Jetimëve!

20 Maji, nuk është Ditë Ndërkombëtare, por është Dita Kombëtare e Jetimëve, pra është shqiptare.

20 Maji, nuk ka qenë dhe nuk mund të jetë kurrë Ditë Feste, por Ditë – Kujtese, Reflektimi dhe Ndërgjegjësimi….

Kaq e qartë dhe kaq e thjeshtë është e gjitha kjo, për të gjithë ata që tregojnë pak kujdes, vëmendje dhe në fund të fundit respekt për kauzat që i shërbejnë humanizimit të shoqërisë sonë….!

Tiranë, 19 Maj, 2023