Në kuadrin e përpjekjeve të saj afatgjata për mirinformimin e votuesve që vijnë nga kategori shoqërore të keqpërfaqësuara, Prezenca e OSBE-së në Shqipëri mundësoi ditën e sotme mbajtjen e një prezantimi përpara Komisionit Qendror të Zgjedhjeve (KQZ) rreth pjesëmarrjes në zgjedhje të votuesve me aftësi të kufizuara shikimi, prezantim ky i hartuar nga Forumi Kombëtar i të Rinjve të Verbër.

Prezantimi u bazua në gjetjet e “Raportit të Monitorimit mbi Pjesëmarrjen e Votuesve me Aftësi të Kufizuara Shikimi në Zgjedhjet Parlamentare të 25 Prillit 2021”, i cili u hartua nga një ekip i të rinjve me aftësi të kufizuara shikimi me mbështetjen dhe ndihmën e Prezencës së OSBE-së.
Prezantimi u pasua nga një diskutim i gjallë i pjesëmarrësve rreth përmirësimeve të nevojshme për heqjen e pengesave dhe ballafaqimin e sfidave, me të cilat përballen votuesit me aftësi të kufizuara shikimi gjatë proceseve zgjedhore. Ndër këto pengesa dhe sfida mund të përmendim qasjen e kufizuar në informacion dhe pamundësinë për të votuar në mënyrë diskrete dhe të pavarur. Veç kësaj, pjesëmarrësit patën mundësinë të diskutojnë me personelin e KQZ-së rreth ndikimit të ndryshimeve të Kodit Zgjedhor në pjesëmarrjen në votime të personave me aftësi të kufizuara shikimi, në veçanti të votuesve të rinj dhe atyre që votojnë për herë të parë.

Pas prezantimit të sotëm, anëtarët e Forumit planifikojnë që t’i vazhdojnë përpjekjet e tyre ndërgjegjësuese rreth të drejtave të personave me aftësi të kufizuara me partitë politike dhe aktorë të tjerë kryesorë, me synimin për të nxitur pjesëmarrjen sa më të gjerë të të rinjve me aftësi të kufizuara shikimi në zgjedhjet e ardhshme që do të mbahen në vend.