Ambasadori i Spanjës në Shqipëri, Gabriel Cremades, u takua me Komisioneren për Mbikëqyrjen e Shërbimit Civil, Znj. Lefterie Lleshi, për t’u njohur me kompetencat e këtij institucioni dhe për të diskutuar mbi funksionimin dhe zhvillimin e shërbimit civil në Shqipëri.

“Gjatë takimit u shkëmbyen përvoja lidhur me profesionalizimin e administratës publike, bazuar në parimet e meritës dhe aftësive profesionale të nëpunësve, forcimin institucional dhe respektimin e ligjshmërisë në proçeset e emërimit, lëvizjes, ngritjes në detyrë dhe lirimit nga detyra të punonjësve publikë”, shkruan ambasada spanjolle në postimin e saj në rrjetet sociale.

Sipas saj, gjithashtu, u diskutua për përafrimin e kuadrit legjislativ shqiptar me standardet e Bashkimit Evropian dhe u theksua rëndësia e shkëmbimit të përvojave dhe praktikave të mira ndërmjet Shqipërisë dhe Spanjës, në kuadër të procesit të integrimit evropian dhe të ndërtimit të një administrate publike moderne, profesionale dhe efikase.