Tirana mirëpriti mbrëmjen artistike “Battle of the Bands”, të organizuar në kuadër të Javës Kulturore Amerikane, e cila bëri bashkë në skenë artistë shqiptarë dhe amerikanë në një atmosferë energjie dhe bashkëpunimi kulturor.

Në koncert performoi grupi “Flagship” i Forcave Detare të Shteteve të Bashkuara në Europë dhe Afrikë, së bashku me Bandën e Forcave të Armatosura Shqiptare dhe artistët Renis Gjoka dhe Gjergj Kaçinari.

Mbrëmja solli për publikun performanca të muzikës rock dhe moderne, të ndërthurura me interpretimet instrumentale të bandave ushtarake, duke krijuar një spektakël të veçantë në kryeqytet.

Aktiviteti u përshëndet edhe nga ministri i Turizmit, Kulturës dhe Sportit, Blendi Gonxhja, i cili ndau momente nga koncerti në rrjetet sociale, duke e cilësuar atë si një shembull të fuqisë bashkuese të muzikës dhe të shkëmbimeve kulturore mes vendeve mike.

Në aktivitet ishte e pranishme edhe e ngarkuara me punë e Ambasadës së Shteteve të Bashkuara të Amerikës në Tiranë, Nancy VanHorn, e cila ndoqi nga afër performancat artistike në kuadër të Javës Kulturore Amerikane.

“Battle of the Bands” ishte një prej aktiviteteve të organizuara në kuadër të Javës Kulturore Amerikane, që përgjatë këtyre ditëve po sjell në Shqipëri evente artistike, kulturore dhe promovuese.

Marrë nga ATSH