Ministri i Shtetit për Pushtetin Vendor, Ervin Demo, mori pjesë në takimin e parë të Komitetit Drejtues për programin EU4Municipalities II, një nismë strategjike me vlerë 11 milionë euro që synon forcimin e pushtetit vendor dhe mbështetjen e rrugës së Shqipërisë drejt Bashkimit Evropian.

Në këtë takim morën pjesë përfaqësues të Delegacionit të Bashkimit Evropian, qeverisë gjermane, GIZ, si dhe institucioneve qendrore dhe organizatave partnere.

Demo tha se, “Programi që prezantuam është një instrument që do të mbështesë bashkitë me investime konkrete, rritje kapacitetesh dhe modernizim të shërbimeve për qytetarët”.

Sipas tij, EU4Municipalities II përbën një mundësi të rëndësishme për njësitë e vetëqeverisjes vendore, si për realizimin e projekteve që përmirësojnë jetën e qytetarëve, ashtu edhe për forcimin e kapaciteteve në përthithjen e fondeve të Bashkimit Evropian në të ardhmen.

Burimi ATSH