Ministrja e Ekonomisë dhe Inovacionit, Delina Ibrahimaj mori pjesë sot në ceremoninë e diplomimit të brezit të parë të studentëve të arsimit profesional, të shkollës së Hoteleri-Turizmit.

Studentër kësaj shkolle kanë studiuar përmes programit të shkollës zvicerane École Hôtelière de Lausanne, një diplomë që ju vlen shumë në tregun e punës, duke iu garantuar kushte dhe paga konkurruese, njëjtë me vendet e Europës.

Në fjalën e saj, ministrja Ibrahimaj tha se “prej shumë vitesh e kemi vënë fokusin tek arsimi profesional, sepse besojmë që nëpërmjet tij ne mund të formësojmë një brez të ri, i cili jo domosdoshmërisht ka nevojë që të vazhdojë universitetin dhe të mbarojë një degë për të pasur një punë të mirëpaguar dhe për t’u kualifikuar”.

Për këtë arsye, vijoi Ibrahimaj, kemi investuar shumë në shkolla, konvikte, laboratorë me qëllim që të mundësojmë të gjithë infrastrukturën e nevojshme që nxënësit të zgjedhin të shkojnë në arsimin profesional.

“Kjo kornizë nuk do të ishte plotësuar pa rritjen e kapaciteteve të mësimdhënies dhe arritjen e eksperiencës në atë që nxënësit mësojnë, përveç infrastrukturës. Sigurisht mësuesit në të gjithë qytetet e Shqipërisë ku ne kemi shkolla janë mësues të dedikuar megjithatë ekselenca botërore i shton një element më shumë dhe na çon një hap më afër shërbimeve dhe standardeve që duam të arrijmë”, nënvizoi Ibrahimaj.

Ministrja Ibrahimaj shtoi se “integrimi europian nuk është një numër detyrash dhe ligjesh që ne duhet të zbatojmë. Integrimi europian vjen me transformimin në të gjitha fushat ekonomike “.

“Jam krenare kur shikoj 60 vajza e djem, të cilët i kanë standardet dinë të japin shërbime në anglisht, por dinë te përdorin edhe programin e IT që janë të përfshira në të gjithë ofrimin e shërbimeve nga shërbimi i tavolinës, kuzhinës apo edhe fushave të tjera të mbuluara nga programi edukativ që ju keni marrë”, tha Ibrahimaj.

Burimi ATSH