Ministri i Turizmit, Kulturës dhe Sportit, Blendi Gonxhja, takoi përfaqësues të një ekipi ndërkombëtar arkitektësh dhe ekspertësh vendas e të huaj, ku u njohën me projektin “Illiri Oceanarium – Museum of Water”, iniciativë e propozuar me karakter destinacioni turistik rajonal, kulturor dhe kërkimor e shkencor.

Në takim ishin të pranishëm arkitektë Ettore Piras (Ettore Piras Architetto EPA), Lev Libeskind (Libeskind Studio Design), Ervin Taçi (MA Studio & Partners) dhe David Y. Monassebian (Envision USA, LLC).

Ministri Gonxhja tha se, projekti “Illiri Oceanarium – Museum of Water” synon zhvillimin e një infrastrukture bashkëkohore në Vlorë, duke vendosur në qendër temën e ujit si element që ndërthur edukimin, kërkimin shkencor dhe përvojën e vizitorëve.

Biseda u përqendrua në vlerësimin e potencialit që kjo nismë mund të ketë për të funksionuar si një atraksion gjithëvjetor dhe për të kontribuar në zgjatjen e sezonit turistik. Sipas MTKS, projekt-ideja është ende në fazë paraprake dhe se do të vijojnë analizat dhe vlerësimet përkatëse në bashkëpunim me bashkinë e Vlorës dhe aktorë të tjerë institucionalë për të përcaktuar mundësinë e realizimit të tij.

Burimi ATSH