Ministrja e Ekonomisë dhe Inovacionit, Delina Ibrahimaj deklaroi sot se rritja e standardeve të prodhimit dhe mbështetja e sipërmarrjes në bujqësi dhe agropërpunim janë thelbësore për integrimin e vendit në tregun e Bashkimit Evropian.

Gjatë një ndalese në një sipërmarrje të përpunimit të vajit të ullirit, ku ishte i pranishëm edhe kryeministri Edi Rama dhe përfaqësues të tjerë të kabinetit qeveritar, Ibrahimaj u ndal te nevoja për rritjen e pagave në bujqësi, nxitjen e investimeve dhe forcimin e skemave mbështetëse për sektorin.

Mbi 70 përfaqësues të fabrikave të përpunimit të vajit të ullirit janë bashkuar në një konsorcium të vetëm, duke krijuar një model të ri bashkëpunimi që synon uljen e kostove dhe rritjen e fitimeve.

Sipas ministres Ibrahimaj, kjo nismë do të mbështetet nga qeveria dhe pushteti vendor përmes një programi të ri kombëtar, të quajtur “Dyfisho ndërmarrjen”, i cili do të financojë bizneset me plane konkrete zhvillimi.

Ibrahimaj theksoi se ky model përfaqëson një shembull të suksesshëm të investimeve në teknologji moderne, duke përfshirë makineri të viteve të fundit që mundësojnë prodhimin e vajit cilësor me potencial të lartë eksporti.

“Procesi i integrimit në BE është një proces transformimi për të gjitha bizneset. Jo vetëm bujqësia, por edhe përpunimi duhet të arrijë standardet e kërkuara, në mënyrë që produktet shqiptare të jenë të tregtueshme në tregun evropian”, u shpreh ministrja.

Ajo nënvizoi se aktualisht vendi flet për eksporte drejt BE-së, por me anëtarësimin, këto standarde do të jenë të detyrueshme edhe për tregun e brendshëm. Për këtë arsye, sipas saj, është e domosdoshme që bizneset të nisin që tani investimet për të përmbushur këto kërkesa.

Në këtë kuadër, Ibrahimaj foli për një nismë të re për mbështetjen e ndërmarrjeve të vogla dhe të mesme, e cila do të fokusohet në financimin e investimeve në makineri, automatizim dhe certifikime të nevojshme për rritjen e cilësisë së prodhimit.

Një tjetër element i rëndësishëm, sipas saj, është bashkëpunimi mes fermerëve dhe bashkive, përmes krijimit të strukturave të përbashkëta që do të mundësojnë përdorimin më efikas të tokës, akses në financim dhe zhvillim të kapaciteteve prodhuese.

Ministrja theksoi gjithashtu se eksportet e produkteve ushqimore shqiptare kanë shënuar rritje në vitet e fundit, duke reflektuar përmirësimin e cilësisë dhe investimet e vazhdueshme në sektor.

“Rritja e eksporteve tregon se produktet shqiptare po gjejnë kërkesë në tregjet e huaja dhe po përmbushin standardet e nevojshme”, tha ajo.

Duke u ndalur te niveli i pagave në bujqësi, Ibrahimaj u shpreh se ato mbeten të ulëta për shkak të strukturës së sektorit, ku dominojnë bizneset familjare. Ajo theksoi se qeveria ka lehtësuar barrën fiskale për këto biznese, duke hequr taksat për një pjesë të tyre.

Megjithatë, sipas saj, faza aktuale kërkon transformimin e këtyre bizneseve nga struktura të vogla familjare në ndërmarrje të mesme dhe të mëdha, me qëllim përfitimin maksimal nga integrimi në tregun evropian prej rreth 450 milionë konsumatorësh.

Ibrahimaj siguroi se qeveria do të vijojë mbështetjen për sektorin bujqësor dhe agropërpunues, duke e konsideruar atë një nga shtyllat kryesore të zhvillimit ekonomik të vendit.

Burimi ATSH