Ministrja e Ekonomisë dhe Inovacionit, Delina Ibrahimaj u shpreh sot se Qeveria po punon rreth një ndërhyrjeje në ligj për të trajtuar pensionistët me pension të parakohshëm që vazhdojnë të punojnë.

Deklarata e ministres Ibrahimaj erdhi gjatë takimit me një grup pensionistësh së Njësisë Nr. 2 në kryeqytet, ku të pranishëm ishin edhe Kryeministri Edi Rama dhe kandidatja për bashkinë Tiranë, Ogerta Manastirliu.

Qytetari, një oficer në lirim u shpreh se ligji aktual, për kategorinë e ushtarakëve në pension të parakohshëm, pengon jo vetëm punësimin, por dhe kontributin e tyre.

“Siç është ligji aktualisht juve po të vazhdoni të punoni dhe të tërhiqni pensionin paguani kontribute dhe nuk merrni asnjë lloj bonusi shtesë në llogaritjen e pensionit. Ndërkohë që me ndërhyrje që do bëjmë këtë vit që do hyjmë në fuqi nga 1 janari i vitit të ardhshëm, të gjithë pensionistët që marrin një pension të parakohshëm, që vazhdojnë të punojnë, do derdhin kontribute, por ndërkohë do marrin bonus mbi kontributet”, tha ajo.

“Pra, pensioni, këto kontribute që do derdhen do ju llogariten si pension shtesë në momentin që do e përfundojnë periudhën e punësimit. Pra dhe do ta tërhiqni pensionin dhe do merrni pagën, do të paguani kontribute dhe pensioni kur ta përfundoni të gjithë periudhën e punësimit do ju dalë më i lartë se ai pensioni i parakohshëm që jeni duke marrë. Kjo është ndërhyrje që ne do të bëjmë këtë vit me qëllim që të gjithë ata që kanë fuqi të punojnë, të gjithë ata që kanë kualifikim, se ne mezi i presim personat e kualifikuar, të vazhdojnë të punojnë dhe të kenë dhe incentiv që t’ rritet pensioni në të ardhmen”, vijoi Ibrahimaj.

Ministrja Ibrahimaj nënvizoi se për profesione të veçanta, do të ketë një vëmendje të shtuar që profesionistët të mbahen në punë dhe të japin kontribut akoma, duke u paguar.

“Sepse kemi disa profesione, nuk e di specifikisht rastin tuaj, po kemi disa profesione, të cilat janë në zhdukje dhe kemi interes që edhe t’i paguajmë më shumë edhe t’i mbajmë më shumë në punë edhe në shtet edhe në privat”, tha Ibrahimaj.

Marrë nga ATSH