Ministrja e Ekonomisë dhe Inovacionit, Delina Ibrahimaj, deklaroi sot se në kushtet e zhvillimeve ndërkombëtare, qeveria po vijon monitorimin e çmimeve në mënyrë të vazhdueshme, ndërsa deri tani rritje domethënëse është konstatuar vetëm në kategorinë e perimeve.

Duke folur për gazetarët pas mbledhjes së qeverisë, Ibrahimaj bëri të ditur se asnjë nga produktet e shportës bazë, rreth 80 të tilla, nuk ka shënuar rritje të çmimeve për shkak të zhvillimeve të lidhura me konfliktin në Iran.

Ajo theksoi se inflacioni në muajin mars ka qenë në nivelin 2,6%, duke u konsideruar i kontrolluar dhe nën objektivin prej 3% të Banka e Shqipërisë. “Kjo do të thotë se deri në këtë nivel kemi një rritje të kontrolluar të çmimeve”, u shpreh ministrja.

Ibrahimaj solli në vëmendje se edhe në të kaluarën qeveria ka ndërhyrë për të mbështetur shtresat në nevojë përmes subvencioneve dhe theksoi se ky monitorim do të vijojë. Sipas saj, në rast se do të ketë rritje të çmimeve për produktet e shportës, do të ndërmerren masa konkrete përmes akteve që parashikojnë mbështetje financiare për kategoritë më të prekura nga efektet e zhvillimeve ndërkombëtare.

Ministrja nënvizoi gjithashtu se rritja ekonomike në nivelin 3,5% deri në 4% i ka krijuar hapësirë qeverisë për të ndërmarrë masa mbështetëse, ndërsa parashikohet një rritje e qëndrueshme në vitet 2026-2027 në nivelet 3,4% – 3,5%, më e lartë se mesatarja e vendeve të rajonit dhe të Bashkimit Evropian.

“Zhvillimet ekonomike na lejojnë të ndërmarrim masa për amortizimin e efekteve nga situatat ndërkombëtare dhe do të jemi në mbështetje të shtresave në nevojë”, theksoi Ibrahimaj.

Burimi ATSH