Sekretari i përgjithshëm i Komitetit Qendror të PKK-së, president i Republikës Popullore të Kinës dhe kryetar i Komisionit Qendror Ushtarak Xi Jinping u shpreh të hënën se një mjedis i mirë ekologjik është për të gjithë dhe kërkon përpjekje të përbashkëta për ta ndërtuar. Ai i tha këto gjatë pjesëmarrjes në një aktivitet vullnetar të mbjelljes së pemëve në Pekin, ku theksoi gjithashtu nevojën për të organizuar e mobilizuar të gjithë shoqërinë për të marrë pjesë gjerësisht në pyllëzim, duke i shtuar bukurinë tokës dhe duke rritur shkëlqimin e modernizimit kinez.

Udhëheqësit e Partisë dhe të shtetit Xi Jinping, Li Qiang, Zhao Leji, Wang Huning, Cai Qi, Ding Xuexiang, Li Xi etj., shkuan të hënën në mëngjes në qytezën Baishan në distriktin Changping të Pekinit për të marrë pjesë në mbjelljen vullnetare të pemëve së bashku me masat popullore.

Vendi i mbjelljes së pemëve është planifikuar të bëhet një park, i cili do të ofrojë hapësirë ekologjike dhe përtëritëse për publikun pas përfundimit të tij.

Ndërsa mbillte pemë, Xi Jinping-u i pyeti fëmijët për studimet, jetën, punën dhe pjesëmarrjen e tyre në mbjelljen e pemëve. Ai theksoi se fëmijët e të rinjtë, ashtu si fidanët, janë plot vitalitet dhe shpresë. Ata duhet të vendosin qëllime të larta, ta duan dijen, punën e natyrën dhe të zhvillohen në drejtime të ndryshme, duke u përpjekur të bëhen shtylla të shoqërisë.

Xi pati një bisedë të përzemërt me kuadro dhe qytetarë. Ai tha se kohët e fundit u miratua Kodi Ekologjik dhe Mjedisor, duke konsoliduar më tej themelin ligjor për ndërtimin e një Kine të bukur. Pyllëzimi është një detyrë e rëndësishme në ndërtimin e një Kine të bukur dhe kjo ndërmarrje e rëndësishme, që i sjell dobi vendit dhe popullit, duhet të kryhet me vendosmëri.

Burimi CGTN