Ministri i Shtetit për Pushtetin Vendor, Ervin Demo, zhvilloi një takim me Kreun e Prezencës së OSBE-së në Shqipëri, Ambasadorin Michel Tarran, për të diskutuar mbi bashkëpunimin mes qeverisë shqiptare dhe OSBE-së në fushën e pushtetit vendor dhe zhvillimit të kapaciteteve demokratike në nivel lokal.

Gjatë takimit, Demo theksoi rëndësinë e bashkëpunimit të ngushtë me partnerët ndërkombëtarë për avancimin e reformave në qeverisjen vendore, duke siguruar një administratë lokale më efikase, transparente dhe të përgjegjshme për qytetarët. Ai nënvizoi se procesi i decentralizimit dhe fuqizimi i pushtetit vendor janë elementë kyç për ofrimin e shërbimeve cilësore dhe për rritjen e besimit të qytetarëve ndaj institucioneve.

Ambasadori Tarran vlerësoi përpjekjet e qeverisë shqiptare për modernizimin e administratës vendore dhe për promovimin e praktikave të mira demokratike në bashkitë dhe komunat e vendit. Ai theksoi se mbështetja e OSBE-së do të vazhdojë të jetë e përqendruar në trajnimin e zyrtarëve vendorë, përmirësimin e procedurave administrative dhe forcimin e mekanizmave të transparencës dhe llogaridhënies.

Në kuadër të takimit u diskutua gjithashtu për rëndësinë e bashkëpunimit ndërinstitucional dhe ndërkombëtar në menaxhimin e projekteve të zhvillimit lokal, përfshirë përdorimin e fondeve publike dhe programet për qytetarët. Ministri Demo theksoi se integrimi i standardeve evropiane në qeverisjen vendore është prioritet strategjik dhe një hap i domosdoshëm drejt procesit të integrimit të Shqipërisë në Bashkimin Evropian.

Takimi shërbeu si një mundësi për të ndarë përvojat dhe sfidat e deritanishme, si dhe për të vendosur prioritetet e ardhshme të bashkëpunimit, duke synuar konsolidimin e institucioneve demokratike, avancimin e shërbimeve publike dhe fuqizimin e rolit të qytetarëve në vendimmarrjen lokale.

Në përfundim, u konkludua se partneriteti strategjik mes qeverisë shqiptare dhe OSBE-së do të vazhdojë të mbështesë reformat e qeverisjes vendore, të sigurojë implementimin e politikave të decentralizimit dhe të kontribuojë në krijimin e një administrate lokale moderne, transparente dhe efektive për qytetarët.

Marrë nga ATSH