Ministrja e Ekonomisë dhe Inovacionit, Delina Ibrahimaj, dha sot detaje të skemës së financimit për startup-et në kuadër të Grant 2026, një iniciativë që synon të mbështesë zhvillimin e ideve të reja dhe rritjen e bizneseve inovative në vend.

Sipas ministres, programi ofron një mbulim të pjesës më të madhe të kostove të projekteve, në varësi të fazës së zhvillimit të startup-it, duke filluar nga faza fillestare deri te shkallëzimi i biznesit.

Në fazën fillestare (F1), skema garanton mbulim 100% të kostove të projektit, me një maksimum prej 1,500,000 lekë, duke mundësuar që sipërmarrësit të fokusohen te zhvillimi i idesë pa pasur barrën e kostove fillestare.

Për startup-et në fazën e validimit (F2), mbulimi arrin 85% të kostove të buxhetit të miratuar, deri në 4,500,000 lekë, duke ndihmuar testimin dhe përsosjen e produkteve në treg.

Ndërsa për ato në fazën e rritjes (F3), programi ofron mbulim prej 75% të kostove të buxhetit, deri në 9,000,000 lekë, duke lehtësuar shkallëzimin dhe zgjerimin e bizneseve me potencial të lartë.

Ministrja Ibrahimaj theksoi se kjo strukturë financimi synon të krijojë një ekosistem të qëndrueshëm për startup-et, duke inkurajuar inovacionin, testimin e produkteve dhe rritjen e qëndrueshme të sipërmarrjeve shqiptare.

Burimi ATSH