UDHËLEXIM I RI, krejt i pazakontë, që tregon se si Shqipëria nuk shihet vetëm si një destinacion turistik disaditor, por si një alternativë reale për të jetuar, punuar, investuar dhe ndërtuar një të ardhme në mënyrë të qëndrueshme.

“Trasferirsi in Albania” i Giovanni Firera-s, nuk është vetëm një guidë praktike për italianët që duan të njohin më mirë mundësitë e jetës, punës dhe investimit në vendin tonë; është edhe një dëshmi e një ndryshimi të qartë në mënyrën se si Shqipëria po perceptohet sot.

Vlera e librit përforcohet edhe nga përvoja e drejtpërdrejtë e autorit. Për më shumë se njëzet vjet, torinezi Giovanni Firera (gazetar, ish-konsull nderi i Shqipërisë në Piemonte, sot përgjegjës për Italinë i “BiznesAlbania”) ka promovuar dhe ndjekur iniciativa të shumta institucionale, kulturore, universitare dhe ekonomike ndërmjet Italisë dhe Shqipërisë.

Ky libër e fton lexuesin të kapërcejë stereotipet dhe përfytyrimet tashmë të vjetruara, duke e paraqitur Shqipërinë si një partnere strategjike të Italisë dhe si një realitet ku marrëdhëniet njerëzore, afërsia gjeografike dhe mundësitë për bashkëpunim mund të krijojnë terren për projekte të reja personale dhe profesionale.

Një Shqipëri dinamike, në transformim, më pranë Europës dhe gjithnjë e më tërheqëse për ata që kërkojnë mundësi të reja.

Urime të përzemërta Giovanni Firera për këtë botim të vlefshëm dhe për kontributin tënd shumëvjeçar në forcimin e urave mes Shqipërisë dhe Italisë!

Libri shumë shpejt do të vijë në shqip!