Zëvendëskryeministrja Albana Koçiu u shpreh sot se puna për realizimin e vizionit të Shqipërisë drejt integrimit europian vijon në të gjithë vendin përmes investimeve konkrete që përmirësojnë cilësinë e jetës së qytetarëve.

Në një postim në rrjetet sociale, Koçiu theksoi se parku në hyrje të qytetit të Shkodrës po merr formë, duke sjellë një model të ri zhvillimi urban që ndërthur mbrojtjen e natyrës me investimet moderne në funksion të komunitetit.

Sipas saj, projekti përfshin ndërtimin e 12 fushave sportive publike, shëtitoreve të gjelbra, pistave sportive, urave për këmbësorë, ambienteve çlodhëse dhe një sistemi modern parkimi.

“Parku i hyrjes së Shkodrës po merr formë, duke sjellë një model të ri zhvillimi urban që ndërthur respektin për natyrën me investimet moderne në shërbim të qytetarëve”, u shpreh Koçiu.

Zëvendëskryeministrja nënvizoi se investimi po transformon hyrjen e qytetit në një hapësirë funksionale, mikpritëse dhe tërheqëse si për banorët, ashtu edhe për vizitorët.

Koçiu e cilësoi këtë projekt si një tjetër investim që dëshmon se vizioni “Shqipëria 2030” po materializohet përmes projekteve konkrete që rrisin cilësinë e jetës, forcojnë potencialin turistik dhe kontribuojnë në krijimin e qyteteve më moderne, më të gjelbra dhe më të jetueshme.

Burimi ATSH