Kryetarja e Autoritetit të Mediave Audiovizive, Armela Krasniqi priti në takim Avokatin e Popullit, Endrit Shabani.

Krasniqi bëri me dije së në fokus të diskutimeve ishte forcimi i mëtejshëm i bashkëpunimit mes dy institucioneve, duke lënë të hapur mundësitë e organizimit të aktiviteteve të përbashkëta në të ardhmen e afërt.

Kryetarja e AMA-s, nënvizoi se me zyrën e Avokatit të Popullit i lidh një bashkëpunim i hershëm dhe i dobishëm, siç është “Aleanca kundër Gjuhës së Urrejtjes”, një nismë e përbashkët me të dhe Komisionerin për Mbrojtjen nga Diskriminimi dhe Këshillin Shqiptar të Medias.

“Kemi qëllimin e përbashkët të luftës kundër gjuhës së urrejtjes nëpërmjet ngritjes së vetëdijes, informimit dhe diskutimin në nivel kombëtar, duke krijuar ura dialogu dhe bashkëveprimi me shoqërinë civile dhe organet publike”, tha Krasniqi.

Sipas Krasniqit, në këtë kuadër, u ra dakord që të programohen tryeza të tjera të përbashkëta për ndërgjegjësimin mbi pasojat e gjuhës së urrejtjes, ndikimin e saj në zhvillimin demokratik të vendit dhe reduktimin e këtij fenomeni në shoqërinë shqiptare.