Ministri për Evropën dhe Punët e Jashtme, Ferit Hoxha, deklaroi sot në Samitin e IV të Diasporës se Shqipëria synon një qasje të re dhe më konkrete në marrëdhënien me diasporën, duke e konsideruar atë një faktor kyç në zhvillimin e vendit dhe procesin e integrimit europian.

Në fjalën e tij në panelin “Rruga përpara – nga komunikimi te bashkëveprimi”, ku u prezantuan linjat kryesore të Strategjisë Kombëtare të Diasporës 2026–2030, Hoxha theksoi se diaspora shqiptare duhet parë si një zgjatim i vetë Shqipërisë.

“Nuk kemi thjesht një diasporë jashtë vendit, por kemi një Shqipëri jashtë kufijve”, u shpreh ai.

Ministri nënvizoi se qasja e re nuk synon rikthimin fizik të emigrantëve, por përfshirjen e tyre aktive në zhvillimin e vendit.

“Nuk duam t’ju thërrasim të vini mbrapsht në Shqipëri, por duam t’ju ftojmë të bëheni aktorë, nëse besoni në angazhimin dhe sinqeritetin tonë, në atë që mund të bëjmë bashkë”, tha Hoxha.

Ai bëri thirrje për bashkëpunim konkret mes institucioneve dhe diasporës, duke theksuar se zhvillimi i vendit është një përgjegjësi e përbashkët.

“Hajde të punojmë bashkë për t’i rregulluar gjërat, sepse ne që kemi vendosur të jetojmë këtu jemi më të interesuar për ta çuar Shqipërinë atje ku e kemi dashur gjithmonë, në familjen europiane”, u shpreh ai.

Hoxha theksoi se strategjia e re synon të jetë më praktike dhe e orientuar drejt rezultateve konkrete.

“Nuk kemi nevojë për më shumë deklarata apo fjalë të bukura, por për një plan veprimi të qartë, me masa konkrete dhe të matshme”, tha ministri.

Ai evidentoi nevojën për më shumë koordinim institucional dhe mungesën e një panorame të plotë mbi aktivitetin e diasporës.

“Sot në Shqipëri nuk ka një hartëzim të saktë të diasporës. Një nga sfidat tona do të jetë krijimi i një atlasi të aktiviteteve dhe kontributeve të saj”, theksoi Hoxha.

Sipas tij, një nga risitë kryesore të strategjisë është lidhja e drejtpërdrejtë me procesin e integrimit në Bashkimin Europian.

“Asgjë në Shqipëri nuk bëhet jashtë kuadrit të integrimit europian. Kjo do të jetë kolona kryesore e strategjisë sonë për diasporën”, u shpreh ai.

Ministri renditi disa nga shtyllat kryesore të strategjisë së re, duke përfshirë një qasje më të centralizuar institucionale, garantimin e të drejtës së votës dhe përfaqësimit të diasporës, forcimin e identitetit përmes gjuhës dhe kulturës, si dhe zhvillimin e dimensionit ekonomik.

Ai bëri të ditur gjithashtu se po punohet për krijimin e një platforme për regjistrimin vullnetar të shqiptarëve jashtë vendit.

“Po ndërtojmë një platformë që do të na ndihmojë të dimë ku janë shqiptarët, në çfarë fushash operojnë dhe si mund të kontribuojnë në zhvillimin e vendit”, përfundoi Hoxha.

Burimi ATSH