Sekretari i Përgjithshëm i NATO-s, Mark Rutte zhvilloi sot një takim në selinë e Aleancës në Bruksel me ministrin e Mbrojtjes së Shqipërisë, Ermal Nufi.

Gjatë takimit, Sekretari i Përgjithshëm vlerësoi përkushtimin e Shqipërisë ndaj NATO-s dhe kontributin e saj në forcimin e sigurisë kolektive.

Palët diskutuan gjithashtu mbi mbështetjen për Ukrainën, në kuadër të zhvillimeve të fundit të sigurisë, si dhe mbi situatën në Ballkanin Perëndimor.

Në fokus të bisedimeve ishte edhe roli i Shqipërisë si vend anëtar i Aleancës në promovimin e stabilitetit dhe sigurisë në rajon.

Detaje nga takimi me Rutte bêri të ditur edhe ministri Nufi. “Bisedë e drejtpërdrejtë dhe shumë produktive me Sekretarin e Përgjithshëm të NATO-s, Mark Rutte, e fokusuar në sfidat aktuale të sigurisë dhe rolin gjithnjë në rritje të Shqipërisë në kuadër të Aleancës”, shprehet ministri përmes një postimi nê rrjetet sociale.

Ministri nënvizon se “Shqipëria kontribuon me vendosmëri në mbrojtjen kolektive dhe afirmohet si faktor stabiliteti dhe pikë referimi për sigurinë në rajon, duke qëndruar krah për krah me Aleatët, nga misionet paqeruajtëse deri te operacionet më të rëndësishme ndërkombëtare, në shërbim të paqes dhe vlerave euro-atlantike”.

Në këtë frymë, shton ai, mbështetja e vazhdueshme e Aleatëve mbetet kyçe për forcimin e kapaciteteve tona mbrojtëse dhe rritjen e gatishmërisë operacionale.

Më herët gjatë ditës, ministri Nufi zhvilloi edhe një takim me personelin ushtarak dhe civil të misionit shqiptar në NATO, po në Bruksel.

Burimi ATSH