Ministri i Mbrojtjes, Ermal Nufi, zhvilloi një takim me personelin ushtarak dhe civil të Misionit të Shqipërisë në NATO, në Bruksel, duke vlerësuar rolin dhe kontributin e tyre në përfaqësimin e vendit në aleancë.

Gjatë këtij takimi, ministri Nufi theksoi profesionalizmin dhe angazhimin e stafit shqiptar në strukturat e NATO-s.

“Një shembull i shkëlqyer i seriozitetit, përkushtimit dhe profesionalizmit në çdo detaj të punës së tyre”, u shpreh ai.

Sipas tij, takimi shërbeu si një moment për të vlerësuar punën e përditshme të personelit dhe për të forcuar më tej bashkëpunimin institucional.

“Kënaqësi e veçantë takimi me ta; një moment për të vlerësuar angazhimin dhe kontributin e tyre të përditshëm, si dhe për të forcuar më tej rolin dhe përfaqësimin dinjitoz të Shqipërisë në aleancë”, deklaroi ministri.

Misioni i Shqipërisë pranë NATO-s në Bruksel luan një rol kyç në koordinimin e politikave të mbrojtjes dhe në përfaqësimin e interesave të vendit në kuadër të Aleancës.

Burimi ATSH