Drejtori i Përgjithshëm i Tatimeve, Ilir Binaj bëri me dije se digjitalizimi i shërbimeve është një nga shtyllat kryesore të Administratës Tatimore për të përmirësuar shërbimet ndaj tatimpaguesve.

Deklarata e Binajt erdhi gjatë konferencës me gazetarët, ku të pranishëm ishin edhe ministri i Financave Petrit Malaj dhe Besmir Beja, Drejtor i Përgjithshëm i Doganave.

Binaj tha se gjatë vitit 2025 u implementuan disa shërbime digjitale dhe nga më të rëndësishmet ishin digjitalizimi i aplikimit për shmangie të tatimit të dyfishtë, si dhe plotësimi i deklaratës së TVSH-së, afati për të cilën ishte fundi i vitit 2026.

Binaj tha se “paraplotësimi i deklaratës së TVSH-së rriti nivelin e deklaruesve në afat dhe rezultoi në kursimin e 54 mijë orëve pune për tatimpaguesit”.

“Paraplotësimi i deklaratës DIVA rezultoi në kursimin e 36 mijë orëve pune për tatimpaguesit, duke e bërë deklarimin më të thjeshtë. Digjitalizimi i vërtetimit të pagës vjetore rezultoi në kursimin e 1.5 milionë orëve pune për tatimpaguesit”, tha ai.

Drejtori i Përgjithshëm i Tatimeve, informoi se pavarësisht disa vështirësive në sistemin e prokurimeve të shërbimeve nga kompanitë IT për digjitalizimin e shërbimeve tatimore gjatë vitit 2026, DPT, së bashku me AKSHI-n, kanë planifikuar implementimin e 11 shërbimeve.

Binaj tha se ndër shërbimet më të rëndësishme janë automatizimi i rimbursimit të fermerëve, automatizimi i procesit të rimbursimit të individëve, automatizimi i marrëveshjes së paqes fiskale etj.

“Krahas digjitalizimit dhe përmirësimit të shërbimit ndaj tatimpaguesve, aksioni ndaj informalitetit në funksion të rritjes së pensioneve vazhdon me intensitet. Administrata Tatimore është e fokusuar në disa sektorë si ndërtimi, turizmi, shërbimet mjekësore dhe kujdesi personal, tregtia bujqësore, sektori i hidrokarbureve”, vijoi ai.

“Në sektorin e ndërtimit kemi përfunduar fazën e parë të mbledhjes së informacionit nga agjencitë imobiliare. Faza e informimit u zgjat deri në mars 2026 për t’i lënë më shumë kohë tatimpaguesve. Rezultatet gjatë kësaj faze ishin premtuese, rreth 29% rritje e deklarimeve dhe 14% rritje në kontributet për sigurimet shoqërore”, tha Binaj.

Administrata Tatimore tha Binaj filluar vlerësimin e dokumentacionit të marrë nga agjencitë imobiliare për komisionet e padeklaruara dhe do të vazhdojë hetimin për formalizimin e pagave.

Sipas tij, në sektorin e turizmit, Administrata Tatimore është fokusuar në të dhënat e marra nga Booking dhe Airbnb, si dhe në sensibilizimin e tatimpaguesve për deklarimin e të ardhurave personale.

“Booking kishte 7–8 mijë tatimpagues për rreth 80 milionë euro rezervime, ndërsa Airbnb kishte rreth 8500 tatimpagues për 40 milionë euro rezervime”, tha Binaj.

Marrë nga ATSH