Ministrja e Ekonomisë dhe Inovacionit, Delina Ibrahimaj deklaroi se tregu i punës dhe të ardhurat e familjeve shqiptare tregojnë stabilitet dhe rritje të qëndrueshme, sipas të dhënave zyrtare të INSTAT.

“Sipas statistikave, papunësia në vend ka qenë 8,3% gjatë vitit 2025, ndërsa norma e punësimit ka arritur 68,9%, duke shënuar rritje krahasuar me tremujorin e fundit. Pjesëmarrja në fuqinë punëtore ka arritur 75,9%, duke u përmirësuar krahasuar me vitin e kaluar”, tha Ibrahimaj sot në konferencën me mediet.

Sipas saj, paga mesatare bruto për vitin 2025 është regjistruar 86.984 lekë, 4,3% më e lartë se në vitin 2024. Ministrja Ibrahimaj theksoi se rritja e pagave ka mbështetur konsumin dhe kërkesën për mallra dhe shërbime. Rritja e pagave vuri në dukje ajo, ka krijuar një trend të qëndrueshëm rritjeje vjetore.

Gjithashtu, tha ministrja, pensionet kanë shënuar rritje prej 8,4%, ndërsa remitancat kanë arritur në 1,12 miliardë euro, me një rritje prej 7,1% krahasuar me vitin e kaluar. Ndërsa të ardhurat e disponueshme të familjeve janë rritur 6,3%, duke reflektuar një forcim të kapacitetit financiar dhe stabilitet të ekonomisë kombëtare.

Ministrja theksoi se këto tregues pasqyrojnë një ekonomi të qëndrueshme dhe një treg pune aktiv, i cili mbështet zhvillimin e konsumit dhe rritjen ekonomike, duke krijuar një bazë të fortë për përballimin e sfidave të ardhshme dhe për avancimin e mirëqenies së qytetarëve.

Burimi ATSH