Kryeministri Edi Rama, njëherësh kryetar i Partisë Socialiste paralajmëroi sot se asnjë kryetar bashkie nuk do të marrë miratimin për të rikandiduar nëse nuk ka firmosur 10 kontrata në kaudër të “Paketës së Maleve” dhe tre ndërmarrje të përbashkëta bujqësore.

Në mbledhjen e Asamblesë Kombëtare të PS-së, Rama theksoi se zgjedhjet e reja vendore nuk kanë pjesëmarrjen e diasporës, por janë momenti për t’i kthyer diasporën vëmendjen që meriton me fakte.

Sipas tij, në dispozicion të diasporës janë vendosur “Paketa e maleve” dhe linjat e kredisë të Bankës së Shqipërisë së bashku me burimet e tjera të financimit për të ndërtuar ndërmarrje të përbashkëta bujqësore mes bashkive dhe komuniteteve në fshat.

Kryeministri theksoi se reforma administrative-territoriale i vendos bashkive në dispozicion gjithë atë territor rural.

“Ky territor nuk duhet të shikohet si territor i punës komunale, për pastrim kanalesh, shtrim rrugësh, apo vendosje ndriçimi. Pushteti vendor me mbështetjen e strukturave qendrore duhet t’i vërë gishtin të gjitha plagëve që kërkojnë shërbim”, tha Rama.

Kryeministri solli në vëmendje kërkesat për ngritjen e pikave të grumbullimit që sipas tij duhet të realizohen si sipërmarrje të bashkisë me fermerët që duan të grumbullojnë produktin.

“Kjo nuk është një shpikje por mund ta gjeni në çdo realitet lokal të BE-së. Ky është një kusht që të gjithë duhet ta mbajnë parasysh si incentivë për t’i bërë këto gjëra nëse duan të rikandidojnë”, shtoi Rama.

Burimi ATSH