Agjencia Kombëtare e Mbrojtjes Civile (AKMC) është në gatishmëri të plotë për përballimin e çdo situate që mund të krijohet pas shembjes së rrugës Librazhd-Përrenjas.

Kështu deklaroi sot drejtori i AKMC, Haki Çako në një konferencë për shtyp.

Çako tha se “AKMC si institucion përgjegjës për zvogëlimin e riskut dhe koordinimin e të gjithë institucioneve në nivel kombëtar në rastin e menaxhimit dhe emergjencave civile dhe fatkeqësive natyrore është menjëherë në dijeni për problematikën e krijuar në bllokimin e aksit rrugor Librazhd-Përrenjas dhe ka komunikuar dhe vijuar kontaktet intensive me Autoritetin Rrugor Shqiptar si institucion kryesor i menaxhimit të kësaj situate duke pasur parasysh që një nga misionet kryesore të mbrojtjes civile është jeta dhe shëndeti i qytetarëve”.

“Janë vënë në dijeni dhe kemi komunikuar në mënyrë të drejtpërdrejtë mediatike apo edhe në komunikim me strukturat vendore, duke angazhuar dhe ngritur në gatishmëri të plotë strukturat e emergjencave në nivel vendor, rajonal dhe kombëtar. Qendra Kombëtare e Emergjencave Civile është tashmë në gatishmëri të plotë 24/7 për të gjitha nevojat që do të ketë komuniteti përreth këtij segmenti, por edhe për të orientuar dhe qartësuar saktësisht edhe lëvizjen e qytetarëve apo për të përcaktuar hotspotet e nevojshme në rastin e një nevoje tjetër që mund të dalë për shkak të bllokimit të këtij aksi rrugor”, nënvizoi Çako.

Kreu i AKMC vuri në dukje se “në dokumentin e vlerësimit të riskut të përcaktuar me akt normativ, një nga fenomenet natyrore është edhe rrëshqitja, bllokimi i rrugëve apo rënia e ortekëve dhe në këtë rast jemi në rastin e një emergjence të rrëshqitjes masive, e cila do të dojë patjetër koordinimin e të gjitha institucioneve”.

“AKMC është në gatishmëri të plotë më të gjitha institucionet në nivel qendror për çdo nevojë qoftë me Forcat e Armatosura, Policinë e Shtetit, Urgjencën Mjekësore dhe Mbrojtjen nga Zjarri dhe Shpëtimi për të mbështetur ARRSH-në dhe të gjitha institucionet e tjera deri në hapjen e aksesit të plotë të këtij segmenti”, tha Çako.

/Marrë nga ATSH