Presidenti i Shteteve të Bashkuara të Amerikës, Donald J. Trump i ka dërguar një mesazh urimi presidentes së Kosovës, Vjosa Osmani, me rastin e 18-vjetorit të shpalljes së Pavarësisë së Kosovës.

Trump uroi popullin e Kosovës për këtë përvjetor të rëndësishëm, duke rikonfirmuar mbështetjen e palëkundur të ShBA-së për sovranitetin dhe integritetin territorial të Republikës së Kosovës.

Presidenti amerikan shpreh gatishmërinë e ShBA për zgjerimin e partneritetit ndërmjet dy shteteve, veçanërisht përmes rritjes së tregtisë dhe investimeve, me synim avancimin e prosperitetit të përbashkët.

Ai thekson se ShBA-ja është e gatshme të punojnë krah Kosovës për avancimin e paqes dhe stabilitetit në dobi të ndërsjellë.

Në këtë letër, presidenti i SHBA-së ka falënderuar presidenten Osmani dhe popullin e Kosovës për mbështetjen e përpjekjeve amerikane për paqe si dhe mirëpriti Kosovën si anëtare themeluese të Bordit të Paqes, që synon ta bëjë botën më të sigurt, më të fortë dhe më të begatë.

Me këtë rast, presidenti Trump shpreh besimin në forcimin e mëtejshëm të bashkëpunimit dhe partneritetit ndërmjet dy vendeve.

Presidentja Osmani e ka falenderuar Trump për urimin e përzemërt për popullin e Kosovës në prag të Ditës së Pavarësisë, si dhe për mbështetjen e palëkundur për sovranitetin dhe integritetin territorial të Republikës së Kosovës.
“Kosova do të qëndrojë gjithnjë krah aleatit tonë strategjik, Shteteve të Bashkuara të Amerikës, në përpjekjet për paqe, stabilitet dhe një botë më të sigurt”, thekson Osmani, teksa ka publikuar në rrjetet sociale letrën e presidentit Trump.

Marrë nga ATSH / KosovaPress