Drejtoresha e Agjencisë Kombëtare të Planifikimit të Territorit (AKPT), arkitekte Adelina Greca, deklaroi sot se projekti për Polin e Drejtësisë synon krijimin e një kampusi modern, që mishëron dinjitet institucional dhe forcon besimin e qytetarëve te sistemi i drejtësisë.

Gjatë dëgjesës përmbyllëse në Tiranë me përfaqësuesit e gjyqësorit me pjesëmarrjen e Kryeministrit Edi Rama, për prezantimin e programit të konkursit ndërkombëtar për Qendrën e Drejtësisë, Greca bëri një prezantim teknik të projektit, duke theksuar se ky investim synon modernizimin e hapësirave të institucioneve të drejtësisë me standardet më bashkëkohore.

Sipas saj, arkitektura luan një rol thelbësor në mënyrën se si funksionojnë institucionet dhe si perceptohen ato nga qytetarët. “Po punojmë për një Pol Drejtësie ku hapësirat që mishërojnë dinjitet, forcojnë besimin tek qytetarët”, u shpreh Greca.

Ajo theksoi se projekti është ndërtuar mbi studimin e detajuar të kampuseve të drejtësisë në vendet europiane, veçanërisht në Itali, duke analizuar standardet e sigurisë, organizimin funksional dhe aspektet teknologjike të nevojshme për institucionet e drejtësisë.

Ndër modelet referuese të prezantuara ishin Gjykata e Parisit, Pallati i Drejtësisë në Amsterdam dhe ai në Romë, si shembuj të praktikave më të mira që mund të përshtaten në projektin shqiptar.

Greca bëri të ditur se Poli i Drejtësisë parashikohet të ngrihet në zonën e rrugës “Dritan Hoxha”, në hyrje të Tiranës, një zonë në zhvillim ku ndodhet edhe Shkolla e Magjistraturës. Sipas saj, janë rreth 7 hektarë sipërfaqe në dispozicion, ku parashikohet ndërtimi i një kampusi me rreth 52 mijë metra katrorë sipërfaqe ndërtimi.

Numri i punonjësve për të cilët do të projektohet ky kampus është rreth 1736 punonjës.

Procesi do të vijojë me hapjen e një gare ndërkombëtare projektimi, konkurs publik arkitektonik, nga ku do të përzgjidhet projekti fitues dhe do të hartohet masterplani për Polin e ri të Drejtësisë.

Greca theksoi se gjatë muajit shkurt do të zhvillohen dëgjesat dhe përzgjedhja do të bëhet nga një juri ndërkombëtare, ndërsa synimi është që në vitin 2028 të nisë zyrtarisht ndërtimi i kampusit.

Marrë nga ATSH