Ministria e Turizmit, Kulturës dhe Sporteve do të investojë rreth 1.4 milion euro për rijetësimin e kinemave në vendin tonë gjatë vitit 2026.

Lajmi u dha nga Qendra Kombëtare e Kinematografisë e cila e konsideron këtë nismë si një ngjarje të jashtëzakonshme për kinemanë në Shqipëri.

Ky investim bëhet për të rikthyer magjinë e filmit tek publiku, anekënd vendit. Shtatë salla kinemaje do të përfitojnë nga modernizimi i teknologjisë dhe i mjediseve, duke krijuar një hapësirë tërheqëse dhe komode për adhuruesit e kinematografisë. QKK e konsideroi këtë investim si “dhuratën më të bukur për publikun shqiptar në këto festa fundiviti nga MTKS dhe ministri Gonxhja”.

Kjo nismë do të ndihmojë gjithashtu në mbështetje të industrisë lokale të filmit dhe do të sjellë më shumë mundësi për artistët dhe profesionistët e tjerë të fushës.

Më herët kreu i këtij institucioni, Jonid Jorgji, në prezantimin e programit të QKK për 2026, në komision parlamentar, deklaroi se synohet nënshkrimi i një marrëveshjeje me bashkitë, për rijetësimin e sallave të kinemave, shumë prej të cilave nuk janë funksionale dhe në kuadër të këtij projekti do të trajnohen punonjësit e tyre si dhe kinematë do të furnizohen me filma shqiptarë.

Burimi ATSH