Presidenti Bajram Begaj, dekretoi sot ndryshimet në kabinetin qeveritar të propozuara nga Kryeministri Edi Rama.

Kështu, Begaj dekretoi shkarkimin nga detyra të Belinda Ballukut nga posti i zëvendëskryeministres dhe ministres së Infrastrukturës dhe Energjisë, Elisa Spiropalit nga posti i ministres për Evropën dhe Punët e Jashtme, Pirro Vengut nga posti i ministrit të Mbrojtjes, Albana Koçiu nga posti i ministres së Punëve të Brendshme, Besfort Lamallarit nga posti i ministrit të Drejtësisë dhe Toni Gogut nga posti i ministrit të Shtetit për Marrëdhëniet me Parlamentin.

Po sot, Presidenti i Republikës, Bajram Begaj, dekretoi emërimin në detyrë të Albana Koçiut në postin e zëvendëskryeministres, Ferit Hoxhës në postin e ministrit për Evropën dhe Punët e Jashtme, Besfort Lamallarit në postin e ministrit të Punëve të Brendshme, Ermal Nufit në postin e ministrit të Mbrojtjes, Toni Gogut në postin e ministrit të Drejtësisë, Enea Karakaçit në postin e ministrit të Infrastrukturës dhe Energjisë dhe Erjona Ismailit në postin e ministrit të Shtetit për Marrëdhëniet me Parlamentin.

Presidenti i Republikës, Bajram Begaj gjithashtu dekretoi sot lirimin e Ferit Hoxhës nga detyra e Ambasadorit të Jashtëzakonshëm dhe Fuqiplotë të Republikës së Shqipërisë në Misionin e Republikës së Shqipërisë pranë Bashkimit Evropian, rezident.

Pas dekretimit nga Presidenti, ndryshimet në kabinetin qeveritar do t’i kalojnë për miratim Kuvendit të Shqipërisë, ku pritet të votohen nga deputetët në seancë plenare.