Presidenti i Komitetit Olimpik Kombëtar Shqiptar (KOKSH), Fidel Ylli, priti në një takim zyrtar mjeshtrin themelues të Taekwondo-së në Shqipëri, Kim Yong Ki, i shoqëruar nga zëvendësministri i Turizmit, Kulturës dhe Sportit, Endrit Hoxha, si dhe përfaqësues të Federatës.

Gjatë takimit u vlerësua kontributi i vazhdueshëm i Mjeshtrit Kim Yong Ki në zhvillimin dhe konsolidimin e Taekwondo-së në vendin tonë.

Edhe pse prej vitesh ushtron veprimtarinë e tij jashtë Shqipërisë, ai vijon të mbështesë me përkushtim rritjen cilësore të këtij sporti, duke ruajtur lidhje të qëndrueshme me komunitetin sportiv shqiptar.

Pjesë e takimit ishte edhe Mjeshtri Kim Shangmeen (7 Dan), i cili do të qëndrojë në Shqipëri për të dhënë kontribut të drejtpërdrejtë në zhvillimin e mëtejshëm të Taekwondo-së.

Fokusi i angazhimit të tij do të jetë zgjerimi i këtij sporti në institucionet arsimore, si dhe trajnimi dhe kualifikimi i trajnerëve të rinj, me synim rritjen e standardeve profesionale.

Në qendër të diskutimeve ishte forcimi i bashkëpunimit ndërkombëtar dhe përmirësimi i cilësisë së përgatitjes sportive, në përputhje me praktikat më të mira dhe standardet bashkëkohore të Taekwondo-së.

Takimi konsiderohet një hap i rëndësishëm drejt thellimit të bashkëpunimit mes institucioneve sportive shqiptare dhe ekspertëve ndërkombëtarë, me synim promovimin e sportit dhe rritjen e përfshirjes së të rinjve në aktivitetet sportive.

Burimi ATSH