Shqipëria zë vendin e parë në rajon për shërbimet e punësimit, sipas raportit të Organizatës për Bashkëpunim dhe Zhvillim Ekonomik (OECD).

Në kuadër të politikave për punësimin e të rinjve u organizua gjatë javës që lamë pas edhe takimi me temë “Rinia 2030 në programet e punësimit”.

Gjatë podkastit “Flasim”, kryeministri Edi Rama solli në vëmendje këtë takim me të rinjtë përfitues nga programet për nxitjen e punësimit, për të cilat Shqipëria, sipas OECD, ka zënë vendin e parë në rajon.

“Kjo është një gjë shumë pozitive sepse flet qartë që puna që kemi bërë gjithë këto vite për të ndërtuar një skemë shërbimesh punësimi moderne, na ka dhënë një rezultat inkurajues”, u shpreh Rama.

Sot, vijoi ai, “kemi 7 programe që funksionojnë për të nxitur punësimin, duke mbuluar të gjitha kategoritë dhe që shkojnë nga praktikat profesionale tek formimi në vendin e punës, nga vetëpunësimi tek riintegrimi social”.

Një tjetër e dhënë, sipas Kryeministrit, është edhe fakti se vetëm brenda këtyre 5 viteve të fundit, 42 mijë të reja dhe të rinj janë punësuar përmes zyrave të punës dhe përmes këtyre shërbimeve.

“Është mirë ta dinë këtë të rinjtë që krejt normal janë skeptikë, janë mosbesues, janë madje indiferentë ndaj këtyre skemave dhe këtyre fjalëve. 7500 janë individë, që kanë përfituar pikërisht nga programet dhe sot janë në punë”, shtoi ai.

Përmbi këtë strukturë që është ndërtuar vit pas viti, Rama tha se “kemi edhe Garancinë Rinore Europiane, e cila është pjesë e një programi gjithë-europian”.

“Një model shumë i suksesshëm që zbatohet edhe në Shqipëri, falë një investimi masiv të Bashkimit Europian prej 63 milionë eurosh. Janë 2200 vajza dhe djem, grupi i parë që po përfitojnë nga Garancia Rinore, objektivi i të cilës është që 60 mijë vajza dhe djem të mbështeten në të gjithë vendin dhe në të gjitha kategoritë brenda këtyre viteve të këtij mandati qeverisës që ne sapo kemi nisur, prej kësaj garancie”, shtoi Rama.

/Burimi ATSH