Kryeministri Edi Rama deklaroi sot se, qeveria ka rritur me 60% buxhetin për programet e punësimit për të rinjtë 2026-ën.

Gjatë një takimi me të rinj të punësuar përmes programeve të nxitjes së punësimit, Rama theksoi se, programi i vetëpunësimit po sjell rezultate të veçanta.

“Programi i vetëpunësimit ka sjellë të dhëna shumë interesante. Ne duam që në vijim të rrisim numrin pikërisht të të rinjve që duan të vetëpunësohen”, u shpreh ai.

Kreu i qeverisë theksoi se mbështetja nuk kufizohet vetëm tek start-upet.

“Nuk flasim këtu për start-upe, flasim për të gjitha llojet e gjërave. Të rinj që duan të vetëpunësohen dhe që duan të hapin një biznes të vogël, duam t’i vëmë në fokusin e kësaj mbështetjeje”, deklaroi Rama.

Sipas tij, buxheti i vitit të ardhshëm do të jetë historik për nxitjen e punësimit të të rinjve.

“Buxheti i vitit që vjen është i konsiderueshëm. Është buxheti më i madh ndonjëherë për të nxitur punësimin për të rinjtë. E kemi rritur me 60% shumën e dedikuar për të rinjtë”, nënvizoi kryeministri.

Rama u bëri thirrje të rinjve që të aplikojnë në programet e punësimit.

“Është 60% më shumë financimi i programeve të punësimit për të rinjtë, por kërkon edhe më shumë aplikantë” theksoi ai, duke paralajmëruar se mungesa e aplikimeve do të ishte e pajustifikueshme.

“Do të ishte skandal që për mungesë të aplikimeve të mjaftueshme ne mos t’i shfrytëzonim të gjitha këto fonde, të cilat duam t’i trefishojmë në tre vitet e kusur që vijnë përpara”, përfundoi Rama.

Burimi ATSH