Një aktivitet promovues u mbajt në Johanesburg të Afrikës së Jugut të mërkurën, për botimin në anglishte të vëllimit të pestë të librit “Xi Jinping: Qeverisja e Kinës”, duke tërhequr rreth 200 pjesëmarrës.

Sipas pjesëmarrësve, vëllimi i pestë pasqyron zhvillimet më të fundit të Mendimit të Xi Jinping-ut mbi Socializmin me Karakteristika Kineze për një Epokë të Re, demonstron në mënyrë sistematike tiparet përcaktuese, rrugët praktike dhe arritjet e jashtëzakonshme të rrugës së Kinës drejt modernizimit, dhe ofron përvojë të vlefshme për vendet e Jugut Global që ndjekin rrugën e tyre të modernizimit.

Kina dhe Afrika e Jugut, të dyja vende anëtare të rëndësishme të mekanizmit të bashkëpunimit të BRICS-it dhe forca të rëndësishme në Jugun Global, do të punojnë së bashku për të zbatuar dhjetë veprimet e partneritetit për përparimin e modernizimit, për të promovuar katër nismat kryesore globale dhe për të kontribuuar në rigjallërimin dhe zhvillimin e Jugut Global, si edhe në realizimin e ëndrrës së përbashkët të modernizimit të Kinës dhe Afrikës, thanë ata.

Ministrja në Presidencën e Afrikës së Jugut për Planifikimin, Monitorimin e Vlerësimin, Maropene Ramokgopa, tha se libri mbulon fusha kyçe, duke përfshirë rrugën e modernizimit të Kinës, luftën kundër varfërisë, bashkëpunimin global për zhvillim e inovacionin teknologjik, dhe ofron një dritare e frymëzim të çmuar për Jugun Global mbi mënyrën se si i interpreton Kina sfidat globale dhe si u përgjigjet atyre.

Afrika e Jugut dhe Kina mbeten të bashkuara në përparimin e multilateralizmit dhe veprimit kolektiv për të përshpejtuar zhvillimin dhe për të forcuar ndërthurjen midis nismës “Një brez, një rrugë” të Kinës dhe Planit Kombëtar të Zhvillimit 2030 të Afrikës së Jugut, shtoi ajo.

Kryetari i Asamblesë Kombëtare të Afrikës së Jugut, Cedric Frolick, tha se libri paraqet një plan gjithëpërfshirës për zhvillimin e ardhshëm të Kinës dhe i ofron Afrikës së Jugut një dritare për të parë vizionin më të fundit të zhvillimit dhe përparësitë e politikës së jashtme të Kinës.

Konceptet e vendosjes së njerëzve në radhë të parë, ndjekjes së zhvillimit të gjelbër, promovimit të begatisë së përbashkët dhe ndërtimit të një bashkësie me të ardhme të përbashkët për njerëzimin ofrojnë përvojë të rëndësishme për vendet që kërkojnë të përparojnë modernizimin dhe të forcojnë kapacitetin e tyre qeverisës, shtoi ai.

Gjatë aktivitetit, të ftuarve iu dhuruan kopje të botimit në anglishte të vëllimit të pestë të librit “Xi Jinping: Qeverisja e Kinës”.

Pjesëmarrësit shkëmbyen gjithashtu pikëpamje mbi tema që përfshinin, ndër të tjera, ndarjen e përvojave të modernizimit, qeverisjen globale dhe Jugun Global, si edhe bashkëpunimin me cilësi të lartë në kuadër “Një brez, një rrugë”.

Aktiviteti u organizua bashkërisht Zyra e Informacionit e Këshillit të Shtetit të Kinës, Grupi i Komunikimeve Ndërkombëtare i Kinës dhe ambasada kineze në Afrikën e Jugut.

Burimi CGTN